يــــــــوم جــــــامد

يوم الخميس 5/7/2007 كان يوم من اسعد ايام حياتي بجد ، كان ميعاد حفلة النجم علي الالفي بجد كان يوم مشكلة وحصلت فيه حاجات تحفة اتقابلنا عند دار القضاء العالي انا - انجي سمراء النيل ولسانها اللى بينقط شتايم قصدي سكر - اودي عادي بئه ودمه اللى زي العسل - احمد فؤاد مع نفسه مش مع حد تاني - سلمى ده مش مدونة ده جاسوسة على رأي انجي - حازم بين الامل واليأس مش عارف يطلع ما بينهم - عمرو اريدك انثى ( فيها كسرة يا جماعة عشان مش يحصل سوء تفاهم ) وقسمنا نفسنا فريقين عشان نركب المهم ركبنا ووصلنا ساقية الصاوي مكان الحفلة بس بعد ايه، بعد ما اطردنا من التاكسي عشان الطريق كان واقف وبعد ما عربية الناموس رشيتنا ( خلوا بالكم عشان المدونة مرشوشه ) والشباب سابتنا واقفين ندور على تاكسي ومشيوا وكان جزائهم في الاخر انهم كانوا ماشين بالتاكسي ورا عربية رش الناموس لحد ما كانوا هيموتوا مخنوقين ( وده جزاء اللى يعمل حركات الندالة طبعاً) كان شكلنا تحفه وكل ده من لسان انجي خلوا بالكم يا جماعة منها ما بتصدق تمسك حد وتنشر غسيله ( بهزر طبعا انجي ده زي العسل والله ) دخلنا الساقية وقطعنا التذاكر وقبلت احلى وارق مدونين

رودي ساعة غروب وطولها الفظيع - اشرف اخف دم وقفشاته -مريم وشوشني وهدوئها الجامد - مروة وينكي وزغروتتها الجامدة - احمد عيسى ولحظاته - طارق محمود شئ جميل وهو كده بردوا - نهي محمود كراكيب وطيبتها الجامدة - طارق واحد من الناس مش بيكلم حد على فكرة ( يارب مش اكون نسيت حد ) بجد الناس ده تحفة وزي العسل والله حسيت اني لقيت نفسي معاهم المهم دخلنا الحفلة وابتدت خفة دم اشرف تطلع ، وتصفقنا ابتدا يعلى ، وزغروتة وينكي بترن في القاعة ، والفضايح ابتدت تظهر من صرخة انجي لكهربة وينكي وفرحتنا بعلي الالفي ابتدت تظهر علينا ، بجد الحفلة كانت تحفة وعلى صوته حلو اوي والاغاني كلمتها روعه وطبعاً اشرف اخف دم مسبش اغنيه الا لما اتكلم عليها واكتر اغنية عجبته الشيكولاته واكيد ده راجع للبنت اللى بتغنيها كان معجب بيها جداً( معلش بئه يا اشرف فضحتك ) الظاهر ان انجي بهتت عليا ، خلص اول جزء من الحفلة وقابلنا علي الالفي بجد انسان في منتهى الروعه والاخلاق وبجد الفرحة كانت هتنط من عينه واحنا حواليه

ابتدا الجزء التاني من الحفلة ومازال اشرف بخفة دمه الفظيعة مش سايب حد في حاله لدرجة انه خلانا هنفطس من كتر الضحك كله كوم والاوضة اللى جوه كوم تاني ( اكيد الجماعة اللى معانا هتفهم ) سكوت يا جماعة علي هيغني احلى اغنية ( اغنية قطرين) بجد الاغنية ده تحفة خلصت الحفة على خير وكلنا كنا مبسوطين على الاخر لدرجة ان الوقت سرقنا وكل واحد روح بيته بعد الساعة واحدة بالليل

انا بجد بقول لكل اللى انا قابلتهم انا مبسوطة بمعرفتكم اوي ويارب نفضل اصدقاء دايماً متجمعين في سعادة وحب على طول

وانا من موقعي هذا بقول لـ علي الالفي انت مطرب روعه وربنا ينجحك دايماً ونشوفك في احسن حال وانا مبسوطة اوي اني اتعرفت على شخصية زيك - وياريت مش تزعل ان اصحابك بتوع بورسعيد مجوش بس احنا كلنا كنا جنبك وهنفضل جنبك على طول

وبشكركم يا جماعة على اليوم ده اوي وبتمنى اننا نتجمع يوم تاني انشالله

وسمعيني احلى زغروته يا وينكي

ملحوظة / ياريت محدش يقولي اكتب تاني عن اي لقاء لاني بجد مش عرفت اوصف جمال اليوم ده والاحداث الحلوة اللى حصلت فيه انا كتبت اللي ربنا قدرني عليه وسمحوني يا جماعة لو كنت نسيت اكتب اي حاجة حصلت تاني مع اني فاكرة اليوم ده بحذفيرة