نقاب .. ولكن

ظاهرة غريبة بشوفها اليومين دول وهي ظاهرة النقاب تلاقي الوحدة فجأة كده وبدون إنذار لبست النقاب وهي مش تعرف أساساً إيه شروط و قواعده ، بيفتكروه زيه زي الحجاب مع إن الحجاب بردوا ليه شروط وقواعد ، أنا مش ضد النقاب ولا حاجة بس مرت عليا ثلاث حالات منهم حالتين كانوا مش لفتيين نظري أوي لكن الحالة الثالثة هي اللي خلتني أقف وأتكلم عن موضوع النقاب
أول حالة وهي (أ) / عندها 19سنة متجوزة وحامل .
لبست النقاب بعد أول أسبوع من جوزها مش عشان مقتنعة بيه أو هتعمل بيه لأخرتها لاء عشان تبعد عنها المشاكل بس ، جوزها غيور وشكاك ومش بيحب اللبس الضيق ولا اللي على الموضة ريحت دماغها ولبست النقاب ( ده على أساس إن مافيش إلا اللبس الضيق في البلد ) قبل ما تلبسه جت وقالت لي إنها هتلبسه وقعد أقول نفس نصائح اللي المفروض تتقال في الموقف ده وهي ( الالتزام بالصلاة في أوقاتها وقراءة القراّن – مافيش هزار في الشارع ولا سماع أو التحدث بكلام خارج عن الحدود – معاملة الناس عامة بحدود كل - حاجة ليها حدود ) وحصل ولبست النقاب ( مع إن محدش غصبها عليه ) وقولت نفس النصائح تاني ولا كأني قولت حاجة مافيش صلاة - كدب على الفاضي والمليان - مجالس النميمة – توصيل كلام غير اللي سمعته خالص – هزار وصوت عالي في الشارع - في رمضان بتصلي الفجر والمغرب بس ، تفتكروا هو ده النقاب ؟
الحالة الثانية وهي (س) 26سنة تقريباً / متجوزة وعندها بنت
حياتها عادية خالص بتخرج وبتشتغل وبتلبس لبس عادي وحجاب من بتاع اليومين دول حصل معاها مشكلة ووصلت لفضيحة وخافت على شكلها أدام الناس راحت لبسه النقاب من غير اقتناع خالص وبردوا مش بتعمل بيه ولا صلاة ولا عاملة حدود مع أي حد – ده غير لسانها اللي مش بيخلى من الكلام في قلة الأدب – والشتائم .

ينفع إن ده تلبس النقاب وتستمر فيه ؟
الحالة الثالثة بئه وهي (ص) 20سنة / متجوزة وعندها ولد .
لقيتها داخلة عليا الشغل وهي منقبة ، ودي بئه بالذات محدش كان يتوقع إنها تلبس النقاب خالص وبردوا مش بتعمل بيه ولبسته بس عشان جوزها قلها تلبسه ( قال يعني البت بتسمع الكلام ) كلمتها وقولت لها مقتنعة بيه قالتلي مش أوي ، طيب أنتي لبساه غصب قالتلي لاء ، طيب لازم تعملي بيه وقولت نفس النصائح ، وقالت لي هتروح تسأل شيخ هو يجوز تقلع النقاب أدام أخوات جوزها ؟ والنبي ده يترد عليها بأية ؟
أنا بئه رديت وقولت لها مش ينفع حرام لأنهم كبار الواحد منهم عدى 16سنة ولازم تغير المعاملة خالص لأنها بقت منقبة يعني الهزار بحدود معاهم – لازم تغيري طريقة لبسك بدل البديهات والبناطيل جلباية واسعة وعليها النقاب ، قالت لي هروح اسأل شيخ قولت لها روحي وقوليله على سن كل واحد فيهم وهو هيقولك نفس كلامي ، بس يا بنت الحلال لو لقيتي نفسك مش هتقدري تتحملي أو هتحسي انك مقصرة أو مش بتعملي بالنقاب لازم تقلعيه عشان مش تشيلي ذنب اكبر وأنتي لبساه ، ومن غير ما تسأل شيخ ولا يحزنون لقيتها تاني يوم الصبح من غير نقاب ، ولقيتها بتقولي هو إحنا بتوع الحاجات ده . بذمتكم ده واحدة تنفع تكون منقبة ؟
ومن هنا بقول يا جماعة أنا لما بقول لواحدة اقلعي النقاب مش بقولها كده عشان مصلحتي لاء ده عشان مصلحتها هي اديكوا شوفتوا ثلاث حالات عاملين إيه بالنقاب دول يحق ليهم إني أقولهم اقلعوا النقاب ولا لاء ؟
بجد أنا مش عارفة أقول إيه النقاب مش كده خالص ، النقاب ده حاجة كده بيخلي الواحدة حاجة تانية خالص ( التزام – هدوء – شعور براحة غريبة وأنت بتتكلم معاها – تلاقيها قريبة أوي من ربنا – عندها حل لكل المشاكل وده بيكون فضل من عند ربنا – بيكون ربنا راضي عنها في كل حاجة ) ده لحالات النقاب اللي بتعمل بيه لأخرتها ولربنا ، مش الحالات اللي فوق ده لا تمد للنقاب بأي صلة .
أنا عارفة إني طولت عليكم أوي بس معلش الموضوع استفزني أوي خصوصاً أني اعرف منقابات في غاية الاحترام والفضيلة

ربنا يهدينا ويهدي الأمة الإسلامية أجمعين ويرحمنا برحمته

ولينا عودة مرة ثانية مع موضوع الحجاب وأشكاله في رمضان